കാരുണ്യ സ്പർശം കുടുംബ സുരക്ഷാ പദ്ധതി
സുൽത്താൻ ബത്തേരി നിയോജകമണ്ഡലത്തിന്റെ പരിധിയിൽ ഉൾപ്പെടുന്ന ഗ്ലോബൽ KMCC മെമ്പർമാരിൽ നിന്ന് കമ്മിറ്റി നിശ്ചയിച്ച ഒരു നിശ്ചിത തുക വാർഷിക സംഭാവനയായി സ്വീകരിച്ചുകൊണ്ട്
നിയോജകമണ്ഡലം ഗ്ലോബൽ കെഎംസിസി യുടെ കീഴിൽ 2021 ജൂലൈ ഒന്നിന് പ്രാബല്യത്തിൽ കൊണ്ടുവന്ന സ്വപ്ന പദ്ധതികളിൽ ഒന്നാണ് " കാരുണ്യ സ്പർശം കുടുംബ സുരക്ഷാ പദ്ധതി എന്നത്.
ഉദ്ദേശ ലക്ഷ്യങ്ങൾ :
-
GLOBAL KMCC സുൽത്താൻ ബത്തേരി നിയോജകമണ്ഡലം കമ്മിറ്റിയുടെ കാരുണ്യ സ്പർശം കുടുംബ സുരക്ഷാ പദ്ധതിയിൽ അംഗമായിരിക്കെ മരണപ്പെടുന്ന അംഗങ്ങളുടെ കുടുംബത്തിന് ഒരു കൈത്താങ്ങ്
-
മാരകമായ രോഗങ്ങൾക്കും ഗുരുതരമായ അപകടങ്ങൾക്കും ചികിത്സാ സഹായം
പ്രസ്തുത ഉദ്ദേശ ലക്ഷ്യങ്ങളോട് കൂടി മണ്ഡലം കമ്മിറ്റി 2021 ൽ നടപ്പിൽ വരുത്തിയ സുരക്ഷാ പദ്ധതി വിജയകരമായി രണ്ടാം വർഷത്തിലേക്ക് പ്രവേശിക്കുകയാണ്.
നിയമാവലിയും അനുബന്ധ കാര്യങ്ങളും :
-
പദ്ധതിയുടെ നടത്തിപ്പ് :
സുൽത്താൻ ബത്തേരി നിയോജകമണ്ഡലത്തിലെ വിവിധ പഞ്ചായത്ത്‌ / മുൻസിപ്പൽ ഗ്ലോബൽ കെ.എം.സി.സി കമ്മിറ്റികളുടെ സഹകരണത്തോടെ ഗ്ലോബൽ കെഎംസിസി സുൽത്താൻ ബത്തേരി നിയോജകമണ്ഡലം കമ്മിറ്റിയാണ് ഈ പദ്ധതി നടത്തുന്നത് .
പ്രസിഡന്റ്‌ , ജനറൽ സെക്രട്ടറി , ട്രഷറർ , കൂടാതെ പദ്ധതിയുടെ കോഡിനേറ്റർമാരായി കമ്മിറ്റി ചുമതലപ്പെടുത്തിയ ഒരു വൈസ് പ്രസിഡന്റ്‌, ഒരു ജോയിന്റ് സെക്രട്ടറി എന്നിങ്ങനെ 5 അംഗങ്ങൾ അടങ്ങിയ ഒരു ബോഡാണ് പദ്ധതിക്ക് നിലവിൽ നേതൃത്വം നൽകുന്നത്.
പുതുതായി തെരെഞ്ഞെടുക്കപ്പെടുന്ന മണ്ഡലം കമ്മിറ്റി പ്രസിഡന്റ്‌, ജനറൽ സെക്രട്ടറി, ട്രഷറർ എന്നിവർ കൂടി ബോഡ് അംഗങ്ങളായി ഉൾപ്പെടുന്നതാണ്.
അതാത് വർഷങ്ങളിൽ കമ്മിറ്റി നിശ്ചയിക്കുന്ന വാർഷിക സംഭാവന അംഗങ്ങളിൽ നിന്ന് സ്വീകരിച്ചുകൊണ്ടാണ് പദ്ധതിയുടെ നടത്തിപ്പിനുള്ള ഫണ്ട് കണ്ടെത്തുന്നത്.
-
അംഗത്വം :
സുൽത്താൻ ബത്തേരി നിയോജകമണ്ഡലത്തിലെ ഗ്ലോബൽ കെഎംസിസിയുടെ മെമ്പർമാർക്ക് മണ്ഡലം കമ്മിറ്റിയുടെ കാരുണ്യ സ്പർശം കുടുംബ സുരക്ഷാ പദ്ധതിയുടെ നിയമാവലി വായിച്ചു ബോധ്യപ്പെട്ടതിന്റെ അടിസ്ഥാനത്തിൽ
അതാത് പഞ്ചായത്ത്‌ / മുൻസിപ്പൽ കമ്മിറ്റികൾ ചുമതലപ്പെടുത്തിയ കോഡിനേറ്റർമാർ മുഖേനെയോ സുരക്ഷാ പദ്ധതിയുടെ മണ്ഡലം കോഡിനേറ്റർമാർ മുഖേനെയോ 1250 രൂപ വാർഷിക സംഭാവന നൽകികൊണ്ട് പദ്ധതിയിൽ അംഗത്വത്തിന് അപേക്ഷിക്കാവുന്നതാണ്..
പ്രസ്തുത തുകയിൽ നിന്ന് 1200 രൂപ മണ്ഡലം കമ്മിറ്റിയുടെ സുരക്ഷാ പദ്ധതിയിലേക്കും 50 രൂപ പദ്ധതിയിൽ അംഗങ്ങളെ ചേർത്തുന്ന അതാത് പഞ്ചായത്ത്‌ /മുൻസിപ്പൽ /മണ്ഡലം കമ്മിറ്റികളുടെ കാരുണ്യ പ്രവർത്തന ഫണ്ടിലേക്കും കൂടി ഉപകരിക്കുന്ന രീതിയിലാണ് 1250 എന്ന സംഖ്യ നിശ്ചയിച്ചിട്ടുള്ളത്.
പദ്ധതിയിൽ ചേരുന്ന അംഗങ്ങൾ പൂർണ്ണ സമ്മതത്തോടെ നൽകുന്ന മേൽ സൂചിപ്പിച്ച സംഭാവനകളിൽ നിന്ന് മാത്രമായിരിക്കും നിയമാവലിയിൽ നിഷ്കർശിക്കുന്ന ഗുണഭോക്താക്കൾക്ക് ആനുകൂല്യങ്ങൾ നൽകുന്നതിനുള്ള ഫണ്ട് കണ്ടെത്തുന്നത്.
മണ്ഡലം കമ്മിറ്റിയുടെ അതാത് വർഷത്തെ പദ്ധതിയുമായി ബന്ധപ്പെട്ട ഫോറത്തിലായിരിക്കണം അപേക്ഷ സമർപ്പിക്കേണ്ടത്
എല്ലാവർഷവും ഏപ്രിൽ 25 മുതൽ ജൂൺ 25 വരെ പദ്ധതിയിൽ അംഗത്വം എടുക്കുന്നതിനും പുതുക്കുന്നതിനുമുള്ള പ്രചാരണ കാലാവധിയായിരിക്കും.
സുരക്ഷാ പദ്ധതിയിൽ അംഗത്വം നേടുന്നവർക്ക് ഏതെങ്കിലും തരത്തിലുള്ള കാർഡുകളോ കൂപ്പണുകളോ കമ്മിറ്റി വിതരണം ചെയ്യുന്നതല്ല.
അതേ സമയം മണ്ഡലത്തിന് കീഴിലുള്ള അതാത് പഞ്ചായത്ത്‌ / മുൻസിപ്പൽ കമ്മിറ്റികൾ വഴിയോ അതെല്ലങ്കിൽ മണ്ഡലം കോർഡിനേറ്റർമാർ വഴിയോ അംഗത്വ നടപടികൾ പൂർത്തീകരിച്ച്, മണ്ഡലം കമ്മിറ്റി അവരിൽ നിന്നും അംഗത്വ വിവരങ്ങളും പദ്ധതിയിലേക്കുള്ള വാർഷിക സംഭാവനകളും കൈപ്പറ്റി കഴിഞ്ഞാൽ ഓരോ അംഗത്തിനും സ്വന്തം "ആധാർ നമ്പറും " മണ്ഡലം GLOBAL KMCC യുടെ "ഐ ഡി നമ്പറും" ഉപയോഗിച്ച് മണ്ഡലം കമ്മിറ്റിയുടെ വെബ്സൈറ്റിൽ നിന്ന് അംഗത്വം പരിശോധിച്ച് ഉറപ്പ് വരുത്താവുന്നതും സ്വന്തം അംഗത്വ കാർഡ് ഡൗൺലോഡ് ചെയ്തെടുക്കാവുന്നതുമാണ്.
പ്രസ്തുത കാർഡ് പദ്ധതിയുടെ അംഗത്വ രേഖയായി പരിഗണിക്കുന്നതുമാണ്.
വാർഷിക സംഭാവന അതാത് പഞ്ചായത്ത്‌ / മുൻസിപ്പൽ കമ്മിറ്റികൾ വഴിയോ മറ്റോ മണ്ഡലം കമ്മിറ്റിയുടെ അക്കൗണ്ടിൽ നിക്ഷേപിക്കുന്നതോടെ മാത്രമേ അംഗത്വ അപേക്ഷകൾക്ക് മണ്ഡലം കമ്മിറ്റി അപ്രൂവൽ നൽകി ആക്റ്റീവ് ചെയ്യുകയുള്ളൂ.
ആക്റ്റീവ് അല്ലാത്ത അംഗത്വങ്ങൾ യാതൊരു ആനുകൂല്യങ്ങൾക്കും പരിഗണിക്കുന്നതല്ല.
ജൂലൈ 1 മുതൽ സ്വന്തം അംഗത്വം മണ്ഡലം ഗ്ലോബൽ കെ.എം.സി.സിയുടെ വെബ്സൈറ്റിൽ നിന്ന് പരിശോധിച്ച് ആക്റ്റീവ് ആണോ അല്ലയോ എന്ന് അംഗങ്ങൾ ഉറപ്പ് വരുത്തേണ്ടതാണ്.
-
അംഗത്വ പുനഃപരിശോധന :
ഗ്ലോബൽ കെഎംസിസി സുൽത്താൻ ബത്തേരി നിയോജകമണ്ഡലം കമ്മിറ്റിയുടെ
www.gkmccsbyconstituency.com എന്ന ഔദ്യോഗിക വെബ്സൈറ്റിൽ പരിശോധിച്ച് അംഗത്വം സാധുവാണോ അല്ലയോ എന്ന് പദ്ധതിയിൽ ചേർന്നിട്ടുള്ള അംഗങ്ങളും
അതോടൊപ്പം പ്രസ്തുത ലിസ്റ്റിൽ, അതാത് പഞ്ചായത്ത്‌ / മുൻസിപ്പൽ കമ്മിറ്റികളിലെ അപേക്ഷിച്ച മുഴുവൻ അംഗങ്ങളുടെയും പേര് വിവരങ്ങൾ ഉൾപ്പെട്ടിട്ടുണ്ടോ എന്നത് കീഴ്ഘടകങ്ങളും പരിശോധിച്ച് ഉറപ്പ് വരുത്തേണ്ടതാണ്.
-
കാലാവധി :
അംഗത്വ കാലാവധി ഒരു വർഷമാണ്. [ ജൂലൈ 1 മുതൽ ജൂൺ 30 വരെ ] എല്ലാവർഷവും കമ്മിറ്റി നിശ്ചയിക്കുന്ന വാർഷിക സംഭാവന നൽകി അംഗത്വം പുതുക്കാവുന്നതാണ്. അംഗത്വം സാധുവാകുന്ന കാലയളവിൽ സംഭവിക്കുന്ന അത്യാഹിതങ്ങൾ മാത്രമേ ആനുകൂല്യങ്ങൾക്കായി പരിഗണിക്കുകയുള്ളൂ.
-
ആനുകൂല്യങ്ങൾക്കുള്ള അർഹത :
1. മരണാനന്തര ആനുകൂല്യം : സാധുവായ കാലയളവിൽ പദ്ധതിയിൽ അംഗമായ ഒരാൾക്ക് സ്വദേശത്തോ വിദേശത്തോ വെച്ച് മരണം സംഭവിച്ചാൽ ( ആത്മഹത്യ ഒഴികെ ) 2 ലക്ഷം രൂപയും
തുടർച്ചയായി 3 വർഷം പദ്ധതിയിൽ അംഗമായിരിക്കെ മരണം സംഭവിച്ചാൽ 3 ലക്ഷം രൂപയും നോമിനിക്ക് ( അവകാശിക്ക് ) മരണാനന്തര ആനുകൂല്യമായി കാരുണ്യ സ്പർശം കുടുംബ സുരക്ഷാ പദ്ധതിയിൽ നിന്ന് നൽകുന്നതാണ്. ഈ കാലയളവിൽ ചികിത്സാ സഹായം ലഭ്യമായയാൾ മരണപ്പെടുകയാണെങ്കിൽ പ്രസ്തുത തുക കുറച്ച് മരണാനന്തര ആനുകൂല്യം അതാത് പഞ്ചായത്ത്‌ / മുൻസിപ്പൽ കമ്മിറ്റികൾ മുഖേന അവകാശികൾക്ക് 60 ദിവസത്തിനുള്ളിൽ എത്തിച്ചു നൽകുന്നതാണ്.
എന്തെങ്കിലും കാരണവശാൽ അവകാശികളുടെ കാര്യത്തിൽ ഏതെങ്കിലും വിധത്തിലുള്ള തർക്കങ്ങളോ പരാതിയോ ഉണ്ടായാൽ ബോഡിന്റെയും കമ്മിറ്റിയുടേയും തീരുമാനം അന്തിമമായിരിക്കും
കോവിഡ് പോലുള്ള മഹാമാരികൾ കാരണമോ മറ്റോ ഏതെങ്കിലും സാഹചര്യത്തിൽ അലംഘനീയമായ വിധി കാരണം മരണ സംഖ്യയിൽ വർദ്ധനവ് വരുകയും ആനുകൂല്യങ്ങൾ നൽകുന്നതിന് മണ്ഡലം കമ്മിറ്റിക്ക് സാമ്പത്തിക ബാധ്യത വരുകയും ചെയ്യുന്ന പക്ഷം പദ്ധതി മെമ്പർമാരിൽ നിന്നും വീണ്ടും സഹായം തേടുന്നതും, അത്തരം സന്ദർഭങ്ങളിൽ അംഗങ്ങൾ സഹകരിക്കേണ്ടതുമാണ്.
2.
ചികിത്സാ ആനുകൂല്യങ്ങൾ : അംഗത്വം സാധുവായ കാലയളവിൽ ( പദ്ധതിയിൽ അംഗമായ കാലയളവിൽ ) സംഭവിക്കുന്ന കാൻസർ, സ്ട്രോക്ക് ,ഹൃദയ, വൃക്ക, സംബന്ധമായ മാരക രോഗങ്ങൾ, ആൻജിയോ പ്ലാസ്റ്റി, മേജർ സർജറി, ജോലി ചെയ്ത് ജീവിക്കാൻ പറ്റാത്ത തരത്തിലുള്ള അപകടങ്ങൾ എന്നിവ ചികിത്സാ സഹായത്തിന് പരിഗണിക്കുന്നതാണ്.
ഇത്തരം സന്ദർഭങ്ങളിൽ മെഡിക്കൽ റിപ്പോർട്ടിന്റെ അടിസ്ഥാനത്തിൽ പരമാവധി 25000 രൂപ വരെ ചികിത്സാ സഹായമായി നൽകുന്നതാണ്.
പദ്ധതിയിൽ അംഗമാകുന്നതിന് മുമ്പ് സംഭവിച്ചിട്ടുള്ള രോഗങ്ങൾക്കും മറ്റും ഒരു കാരണവശാലും ആനുകൂല്യങ്ങൾ ലഭിക്കുകയില്ല.
ഒരേ രോഗത്തിന് എത്ര വർഷം അംഗമായിരുന്നാലും ശരി ഒരിക്കൽ മാത്രമേ ചികിത്സാ സഹായം അനുവദിക്കൂ.
അതാത് പഞ്ചായത്ത്‌ / മുൻസിപ്പൽ കമ്മിറ്റികൾ മുഖേനെ മെഡിക്കൽ റിപ്പോർട്ടുകളും അനുബന്ധ രേഖകളും സമർപ്പിച്ചുകഴിഞ്ഞാൽ പരമാവധി 30 ദിവസത്തിനുള്ളിൽ ചികിത്സാ സഹായം നൽകുന്നതാണ്.
-
സഹായത്തിനുള്ള അപേക്ഷയോടൊപ്പം സമർപ്പിക്കേണ്ട രേഖകൾ :
ചികിത്സാ ആനുകൂല്യങ്ങൾക്കുള്ള അപേക്ഷയോടൊപ്പം
അസുഖ വിവരവും ആശുപത്രി പ്രൊസീജറുകളും ഉൾപ്പെടുന്ന ആശുപത്രിയിൽ നിന്നും ഡിസ്‌ചാർജ് ചെയ്യുമ്പോൾ ലഭിക്കുന്ന
DISCHARGE SUMMARY REPORT
DISCHARGE BILL
MEDICAL BILL
തുടങ്ങിയ രോഗിയുമായി ബന്ധപ്പെട്ട വിവരങ്ങളും സുരക്ഷാ പദ്ധതിയുടെ ബോഡ് ആവശ്യപ്പെടുന്ന അനുബന്ധ രേഖകളും അതാത് പഞ്ചായത്ത്‌ / മുൻസിപ്പൽ കമ്മിറ്റികൾ മുഖേനെ സമർപ്പിക്കേണ്ടതാണ്.
-
ആനുകൂല്യങ്ങൾ അനുവദിക്കുന്നതിനും ആവശ്യമായ മാറ്റ തിരുത്തലുകൾ വരുത്തുന്നതിനുമുള്ള അധികാരം :
പദ്ധതിയിൽ നിന്നുള്ള ആനുകൂല്യങ്ങൾ അനുവദിക്കുന്നതിനും അത്യാവശ്യ സന്ദർഭങ്ങളിൽ ആനുകൂല്യങ്ങളിലും മറ്റും ആവശ്യമായ മാറ്റ തിരുത്തലുകൾ വരുത്തുന്നതിനുമുള്ള അധികാരം പദ്ധതിയുമായി ബന്ധപ്പെട്ട ബോഡിനാണ്.
-
അനുബന്ധ മാർഗ്ഗ നിർദ്ദേശങ്ങൾ :
പദ്ധതിയുടെ നിയമാവലിയും ,അപ്ഡേറ്റ് ചെയ്യുന്ന വിവരങ്ങളും മറ്റും ബോഡ് യോഗത്തിന് ശേഷം യഥാ സമയം അംഗങ്ങളെ അറിയിക്കുന്നതിന്
പഞ്ചായത്ത്‌ / മുൻസിപ്പൽ കമ്മിറ്റികൾക്ക് മണ്ഡലം കമ്മിറ്റി മുഖേനെ സർക്കുലർ നൽകുന്നതാണ്.
-
അന്തിമ തീർപ്പ് കൽപ്പിക്കൽ :
സുപ്രധാനമായ വിഷയങ്ങളിൽ അന്തിമ തീർപ്പ് കൽപ്പിക്കുവാനുള്ള അവകാശം GLOBAL KMCC സുൽത്താൻ ബത്തേരി നിയോജകമണ്ഡലം കമ്മിറ്റിയിൽ നിക്ഷിപ്തമാണ്..
GLOBAL KMCC SULTHAN BATHERY CONSTITUENCY COMMITTEE
